ҚИРҒИЗИСТОН РЕСПУБЛИКАСИ ПРЕЗИДЕНТИ САДИР ЖАПАРОВГА ОЧИҚ МУРОЖААТ!
Ҳурматли Жаноб Президент!
MyCountry.uz & MyPresident.uz ахборот-таҳлилий нашри номидан Сизга чуқур ҳурмат бажо келтирган ҳолда мурожаат қилмоқдамиз.
Ўзбекистон ва Қирғизистон халқлари асрлар давомида яхши қўшничилик, қардошлик ва ўзаро ҳурмат ришталари билан боғланиб келган. Сўнгги йилларда икки давлат ўртасидаги дўстлик ва стратегик ҳамкорлик муносабатлари янги босқичга кўтарилиб, Марказий Осиёда барқарорлик ва тараққиётга хизмат қилмоқда.
Шу муносабат билан Қирғизистон Республикасининг собиқ Президенти, қирғиз халқи вакили Аскар Акаев томонидан Ўзбекистон Республикаси Биринчи Президенти марҳум Ислом Абдуғаниевич Каримов фаолияти юзасидан билдирилган айрим фикрлар Ўзбекистон жамоатчилиги вакиллари орасида турли муносабатларга сабаб бўлганини, ўзини Ўзбекистон фарзанди эканлигидан фахрланадиган, инсоний туйғуларини асраган ҳар бир ватандошимиз учун Ислом Каримовнинг шахси ва шаъни қадрли эканини маълум қиламиз.
Айни пайтда, вафот этган шахсни қоралаш инсонийлик мезонларига тўғри келмаслигини алоҳида таъкидламоқчимиз. Ҳар бир халқ ўз тарихий шахсларига ҳурмат билан ёндашади, айниқса, ўз давлати ва халқининг тақдирида муҳим ўрин тутган инсонлар хотирасини асрашга интилади.
Шунингдек, Аскар Акаев бир пайтлар Ўзбекистонни ёпиқ давлат деб танқид қилган бўлса-да, тарих шуни кўрсатадики, Ислом Каримов ўз даврида замон талабига муносиб равишда иш олиб борган, давлат мустақиллигини мустаҳкамлаш, миллий давлатчилик асосларини яратиш ҳамда мамлакат тараққиёти йўлида муҳим тарихий роль ўйнаган. У ичимиздаги оғир ва синовли жараёнларда халқ орасига кириб бориб, тинчлик ва барқарорликни сақлашга астойдил ҳаракат қилган бир пайтда, Аскар Акаевнинг ўша оғир даврда ўз юртини тарк этгани ҳам тарихий ҳақиқатдир. Бу ҳолат ўша даврлар қанчалик мураккаб бўлганини яққол кўрсатади.
Шунингдек, Сиз, ҳурматли Қирғизистон Президенти Садир Жапаров! Ўзбекистон Қирғизистондан 40 йил олдинда эканини айтганингиз ҳам бежиз эмас. Бу фикр бугунги ютуқларимизнинг ортида аввалдан ўрнатилган мустаҳкам пойдевор борлигини яна бир бор тасдиқлайди. Бугунги ҳар бир ютуқ, ҳар бир ислоҳот ва ҳар бир тараққиёт босқичи ўша даврларда қўйилган асослар самарасидир.
Давлатимизга оид муаммоларни бизнинг ўзимиз таҳлил қила олишимиз, уларни ички сиёсий ва ижтимоий жараёнлар доирасида холис баҳолашимиз мумкинлигини қайд этмоқчимиз. Четда туриб, бизнинг раҳбаримиз бўладими ёки оддий инсонимиз бўладими, унинг фаолиятини юзаки ёки бирёқлама тарзда танқид қилиш ўринсиздир. Бундай масалаларда энг тўғри ёндашув — ўзаро ҳурмат, эҳтиёткорлик ва тарихий ҳақиқатга содиқликдир.
MyCountry.uz & MyPresident.uz таҳририяти Ўзбекистон ва Қирғизистон халқлари ўртасидаги дўстлик ва ўзаро ҳурмат тамойилларини юксак қадрлайди. Биз тарихий масалаларнинг сиёсий баҳслар эмас, балки илмий ва экспертлар даражасидаги очиқ мулоқотлар орқали муҳокама қилинишини қўллаб-қувватлаймиз.
Фурсатдан фойдаланиб, Ўзбекистон ва Қирғизистон ўртасидаги дўстона муносабатларни янада мустаҳкамлаш йўлидаги саъй-ҳаракатларингизга муваффақият тилаймиз.
Ҳурмат билан,
MyCountry.uz & MyPresident.uz таҳририяти номидан
Азиза Турдиева
MyCountry.uz & MyPresident.uz
Ўзбекистон Республикаси
2026 йил
QIRG‘IZISTON RESPUBLIKASI PREZIDENTI SADIR JAPAROVGA OCHIQ MUROJAAT!
Hurmatli Janob Prezident!
MyCountry.uz & MyPresident.uz axborot-tahliliy nashri nomidan Sizga chuqur hurmat bajo keltirgan holda murojaat qilmoqdamiz.
O‘zbekiston va Qirg‘iziston xalqlari asrlar davomida yaxshi qo‘shnichilik, qardoshlik va o‘zaro hurmat rishtalari bilan bog‘lanib kelgan. So‘nggi yillarda ikki davlat o‘rtasidagi do‘stlik va strategik hamkorlik munosabatlari yangi bosqichga ko‘tarilib, Markaziy Osiyoda barqarorlik va taraqqiyotga xizmat qilmoqda.
Shu munosabat bilan Qirg‘iziston Respublikasining sobiq Prezidenti, qirg'iz xalqi vakili Askar Akayev tomonidan O‘zbekiston Respublikasi Birinchi Prezidenti marhum Islom Abdug‘aniyevich Karimov faoliyati yuzasidan bildirilgan ayrim fikrlar O‘zbekiston jamoatchiligi vakillari orasida turli munosabatlarga sabab bo‘lganini, o'zini O'zbekiston farzandi ekanligidan faxrlanadigan, insoniy tuyg'ularini asragan har bir vatandoshimiz uchun Islom Karimovning shaxsi va sha'ni qadrli ekanini ma'lum qilamiz. Ayni paytda, vafot etgan shaxsni qoralash insoniylik mezonlariga to‘g‘ri kelmasligini alohida ta'kidlamoqchimiz. Har bir xalq o‘z tarixiy shaxslariga hurmat bilan yondashadi, ayniqsa, o‘z davlati va xalqining taqdirida muhim o‘rin tutgan insonlar xotirasini asrashga intiladi.
Shuningdek, Askar Akayev bir paytlar O‘zbekistonni yopiq davlat deb tanqid qilgan bo‘lsa-da, tarix shuni ko‘rsatadiki, Islom Karimov o‘z davrida zamon talabiga munosib ravishda ish olib borgan, davlat mustaqilligini mustahkamlash, milliy davlatchilik asoslarini yaratish hamda mamlakat taraqqiyoti yo‘lida muhim tarixiy rol o‘ynagan. U ichimizdagi og‘ir va sinovli jarayonlarda xalq orasiga kirib borib, tinchlik va barqarorlikni saqlashga astoydil harakat qilgan bir paytda, Askar Akayevning o‘sha og‘ir davrda o‘z yurtini tark etgani ham tarixiy haqiqatdir. Bu holat o‘sha davrlar qanchalik murakkab bo‘lganini yaqqol ko‘rsatadi.
Shuningdek, Siz,hurmatli Qirg‘iziston Prezidenti Sadir Japarov! O‘zbekiston Qirg‘izistondan 40 yil oldinda ekanini aytganingiz ham bejiz emas. Bu fikr bugungi yutuqlarimizning ortida avvaldan o‘rnatilgan mustahkam poydevor borligini yana bir bor tasdiqlaydi. Bugungi har bir yutuq, har bir islohot va har bir taraqqiyot bosqichi o‘sha davrlarda qo‘yilgan asoslar samarasidir.
Davlatimizga oid muammolarni bizning o‘zimiz tahlil qila olishimiz, ularni ichki siyosiy va ijtimoiy jarayonlar doirasida xolis baholashimiz mumkinligini qayd etmoqchimiz. Chetda turib, bizning rahbarimiz bo‘ladimi yoki oddiy insonimiz bo‘ladimi, uning faoliyatini yuzaki yoki biryoqlama tarzda tanqid qilish o‘rinsizdir. Bunday masalalarda eng to‘g‘ri yondashuv — o‘zaro hurmat, ehtiyotkorlik va tarixiy haqiqatga sodiqlikdir.
MyCountry.uz & MyPresident.uz tahririyati O‘zbekiston va Qirg‘iziston xalqlari o‘rtasidagi do‘stlik va o‘zaro hurmat tamoyillarini yuksak qadrlaydi. Biz tarixiy masalalarning siyosiy bahslar emas, balki ilmiy va ekspertlar darajasidagi ochiq muloqotlar orqali muhokama qilinishini qo‘llab-quvvatlaymiz.
Fursatdan foydalanib, O‘zbekiston va Qirg‘iziston o‘rtasidagi do‘stona munosabatlarni yanada mustahkamlash yo‘lidagi sa'y-harakatlaringizga muvaffaqiyat tilaymiz.
Hurmat bilan,
MyCountry.uz &MyPresident.uz tahririyati nomidan
Aziza Turdiyeva
MyCountry.uz & MyPresident.uz
O‘zbekiston Respublikasi
2026 yil
